تبصره
د ١٥ کلونو په تيريدو سره چې د امريکا په مشرۍ کې د ناتو غړوهيوادونو په افغانستان کې د افغان مظلوم ولس په نيولو، زنداني کولو او وژلو جګړه دوامداره وساتله او هره ورځ د لسګونو طالبانو د وژلو ادعاوې کوي بياهم دولت ونه توانيدو چې طالبانو ته ماتې ورکړي.
اوس چې بهرني ځواکونه په افغانستان کې د جنګې ماموريت د پاې ته رسيدو او يا ېې د تښتيدو له امله افغانستان پريښى دى افغان ځواکونه په يواځې سر د هيواد د امنيت په ساتلو کې د طالبانو ځواب نه شي ويلى چې د کندز د ښار او په هلمند او يو شمير نورو ولايتونو کې د ولسواليو نيول ېې جوت ثبوت دى.
تيره ورځ د سپتمبر٢١مه چې د سولې نړيواله ورځ وه د بي بي سي سره په مرکه کې د پګواش نړيوال سازمان د دارالانشاء مشر پروفیسر پاولو کوټا رامسینو وويل: طالبان کابل نه شي نيولى او هم دولت طالبان نه شي ماتولی.
د پاولو کوټا رامسینو خبره ترڅه حده په ځاى ده. دا چې طالبان ېې نه منې پدې خاطر چې ترخپل توانه په کابل کې د موجوده ادارې اختلافاتو ته په کتنه هڅې کوي چې د جان کيري په لاس جوړ نظام رانسکور کړي او دولت ېې په دې ډاډ نه مني چې د افغان امنيتي پوځونو د مرستو لپاره خو ورته بيا امريکا په هلمند کې پوځونه او بې۵۲ډوله بم غورځوونکې تيارې چمتوکړې.
د سولې نړيواله اداره پګواش چې د افغان دولت او طالبانو ترمنځ په لوړه کچه د سولې په اړه خپلې هڅې دوامداره ساتي وايي د افغانستان مسئله په جګړو نه، بلکې په مذاکراتو سره حل کيداى شي.
د پګواش مشروويل، له طالبانو سره په پرله پسې توګه په اړیکه کې دي او هڅه کوي څومره ژر چې امکان ولري د سولې خبرې به پیل شي؛ خو دا ېې نه ده څرګنده کړې چې کله او په کوم ځای کې به خبرې وشي.
د سولې نړيوالې ادارې پګواش په کابل او يو شمير ولايتونو کې د سولې په اړه د قومي، سياسي او مذهبي مشرانو نظرونه پوښتلي او هم ېې د افغانستان په بهر کې د يو شمير افغانانو سره غونډې کړي دي چې تر يو څه حده ېې په دې اړه پرمختګ هم کړی دی.
تيرکال د ميي د مياشتې په دوېمه- درېمه په قطر کې د سولې نړيوال سازمان پګواش دوه ورځنی سمينار جوړ کړى و چې پکې د حامد کرزي د واکمني د مهال ځینو پخوانيو چارواکو، مدني فعالانو، د طالبانو استازو او د ملي شورا یو شمیر غړوبرخه اخستې وه .
د دولت لخوا د جوړې سولې شورا د قطرپه دوه ورځني سيمينار کې په رسمي توګه برخه نه درلوده؛ خو د افغان سياستوالو په وينا تر ډيره حده پدې سيمينار کې داهڅه وشوه چې د افغانستان د کړکیچ په حل لاره کې د ښکیلو اړخونو نظرونه سره نژدې کړي.
په هيواد کې د روانې جګړې د پای ته رسيدو لپاره د هر چا لخوا چې بې غرضه مرسته کيږي د ستاينې وړده؛ خو د طالبانو او دولت ترمنځ سوله عادي خبره نه ده، دولت د طالبانو مخالفت کوي، طالبان او ولس
د امريکا لخوا د جوړ دولت مخالفت کوي، د دوی ترمنځ دې خداې وکړي چې په افغانستان کې د جګړې
د پای ته رسيدو لپاره ژر سوله وشي.
خو! د طالبانو سره سولې ته بايد د حکمتيار سره د سولې په نظر و نه کتل شي، کابل ته د راليږل شوي مرکچي په شمول د حکمتيارصاحب ټول حزب اسلامي په دولت کې ځاې شوي دي يواځې حکمتيارصاحب،
د هغه موټرچلوونکى او اشپز(پخوونکى) ېې له دولته بهرپاتې دې، چې د سولې د اعلان وروسته به دوی هم دولت سره يوځاې شي.
هر افغان، ګاونډي او نړيوال بايد د افغانستان په سوله راوستو کې مرسته وکړي يو داسې ميکانيزم او سولې ته
اړتياده چې د افغانانو ټول افتخارات، ارضي تماميت، اسلامي او ملي ارزښتونو په پام کې نيولوسره په جګړه کې ښکیلې خواوې د تل لپاره یوبل ته د ورورګلوۍ غاړې ورکړي.
