پروان: بګرام کې څلور امريکايي عسکر وژل شوي
(کابل ټکی کام ۱۳۹۵تله ۷) الماس خدرخېل
تېره شپه د پروان ولایت په بګرام ولسوالۍ کې د طالبانو د ماين په چاودنه کې څلور امریکايي عسکر وژل شوي دي.
دغه پېښه هغه مهال رامنځته شوه، چې امريکايي عسکر د بګرام په قلندرخېلو سيمه کې د طالبانو په يو ښښ کړل شوي ماين وربرابر شول.
طالبانو کابل ټکی کام ته په رالېږلې خبرپاڼه کې ويلي، چې امريکايي عسکر له سيمې نه د تېرېدلو په حال کې وه، چې چاودنه پرې وشوه.
خبرپاڼه کې راغلي، چې دوی د عمري عملياتو په جريان کې د امريکايي عسکرو ټانګ په مکمله توګه ويجاړ کړی او پکې سپاره عسکر يې له منځه وړي دي.
د يادونې ده، چې تېره ورځ هم د طالبانو په يوه چاودنه کې د کندهار ولايت په ډنډ ولسوالۍ کې ۶ تنه امريکايي عسکرو خپل ژوند له لاسه ورکړ.
د بهرنیانو کومې سرچينې تر اوسه د خپلو عسکرو د وژل کېدو په اړه رسنیو ته څه نه دي ويلي.
