(کابل ټکی کام ۱۳۹۵ تله ۷ ) زرغون خوږیاڼی
د پنځوس اوریز سیریز لوبو په لړ کې د افغانستان او بنګله دیش تر منځ لومړۍ لوبه بنګله دیش ګټلې وه، چې نن د دواړو لوبډلو تر منځ دویمه لوبه ترسره شوه او افغان لوبډلې بنګله دیش ته ماتې ورکړه.
د لوبې پچه افغان لوبډلې ګټلې وه او د بنګله دیش لوبډلې ته یې د توپوهنې بلنه ورکړه، بنګله دیش د وروستي اوور په درېیم بال د ټولو لوبغاړو په سوځیدو سره ۲۰۸ منډې جوړې کړې او افغانستان ته یې د ګټې لپاره ۲۰۹ منډې هدف وټاکه.
افغان لوبډلې د وروستي اوور په پنځم توپ څلوریزه ووهله او یاد هدف یې پوره کړ.
اصغر ستانکزي نن په زړه پورې لوبه وکړه، چې خپلې لوبډلې ته یې ۵۷ منډې جوړې کړې، شهزاد ۳۵ منډې، حشمت الله شاهدي ۱۴ منډې، محمدنبي عیسی خیل ۴۹ منډې، نوروز منګل ۱۰ منډې، نجیب الله ځدران ۲۲منډې، راشد خان ۵، میرویس اشرف ۹ او دولت ځدران ۴ منډې جوړې کړې.
د لوبې غوره لوبغاړی محمد نبی عیسی خیل ونومول شو، چې په دې لوبه کې یې ۴۹ منډې وکړې او دوه لوبغاړي يې هم وسوځول.
