فراه: بالابلوک کې د بهرنيانو په هوايي بريد کې ۵ کمانډويي عسکر وژل شوي
(کابل ټکی کام ۱۳۹۵تله ۱۰) الماس خدرخېل
د فراه ولایت سيمه ييزو چارواکو رسنيو ته ویلي، چې د دغه ولايت بالابلوک ولسوالۍ په کنسک سيمه کې تېره شپه پر کمانډو ځواکونو هوايي بريد شوی.
د يادې ولسوالۍ ولسوال ملاسيدمحمد ازادۍ راډيو تائيد کړه، چې په کنسک سيمه کې په افغان کمانډو ځواکونو هوايي بريد شوی خو د مرګ ژوبلې په اړه يې مالومات ورنکړل.
ولسوال زياته کړه، د بهرنيو ځواکونو هوايي بريد هغه مهال رامنځته شو، چې کمانډو ځواکونو غوښتل د دولت پر وسلوالو مخالفينو يو غلچکی بريد ترسره کړي.
د ظفر قول اردو مسوولین پيښه تائيدوي او وايي چې تېره شپه د بالابلوک ولسوالۍ اړوند د کنسک په سیمه کې بهرنیو عسکرو د افغان کمانډویانو پر پوسته بمبار کړی، چې ۵ کمانډويي عسکر او یو پولیس وژل شوي، دوی وايي چې ۵ کمانډویان ټپیان شوي دي، چې د ټپيانو حالت ښه نه دی.
يوې امنيتي سرچينې ويلي، چې پر کمانډو ځواکونو دغه بريد کې ۵ تنه کمانډويان وژل شوي او يو شمير نور يې ټپيان دي.
دا لومړی ځل نه دی، چې په حکومتي سرتيرو د بهرنيانو هوايي بريدونه کېږي، تر دې وړاندې په ارزګان ولایت کې په ملي اردو د بهرنيانو په هوايي بريد کې ۸ پوليس ووژل شول.
همداراز درې ورزې وړاندې هم د بهرنيو ځواکونو هوايي بريدچې د ننګرهار په اچين ولسوالۍ د يو حاجي په کور ترسره شو، پکې لسګونه تنه ولسي خلک ووژل شول او يو شمير نور يې ټپيان شول.
تر اوسه بهرنیو ځواکونو په دې اړه څه نه دي ویلي.
