پکتيکا: انګور اډه کې دروازه تر نړېدو وروسته پرانستل شوه
(کابل ټکی کام ۱۳۹۵تله ۱۰) الماس خدرخېل
تېره ورځ د پکتيکا برمل ولسوالۍ کې يو شمېر اوسېدونکو د دغه ولايت د انګور اډې تاسيسات چې د پاکستان له لوري جوړ شوي وو وران کړل شول.
د برمل يو قومي مشر رسنيو ته وويل، چې د يادې ولسوالۍ سلګونه کسانو د دغې تاسیساتو پر خلاف لاريونونه وکړل او وروسته يې دغه تاسيسات ونړول.
هغه زياته کړه: ((موږ دا تاسیسات له دې کبله وران کړل چې د افغانستان پر خاوره جوړ شوي وو او پاکستان غوښتل چې دغه دروازه د خپل ځان لپاره د یوه تاریخي ثبوت په توګه جوړه کړي)).
د برمل يو اوسېدونکي اسدالله پژواک اژانس ته وويل: چې د دغې دروازې له کبله دوه قومي ورونه له یوه بله بېل شوي وو چې اوس د دغې دروازې په ورانېدو سره بېرته یوځای شول.
د ولسوالۍ د اوسېدنکو په وينا: د سيمې اوسېدونکي به نور پاکستاني ځواکونو ته د دې اجازه ورنکړي چې د افغانستان پر خاوره نظامي تاسيسات جوړ کړي.
نن د دروازې تر نړېدو وروسته دغه لاره د ترافيکو پر مخ خلاصه شوه او ځايي خلکو خپل تجارت او تګ راتګ پيل کړی دی.
د کرښې دواړو غاړو مشرانو رسنيو ته وويل، چې د دوی د خپلمنځي کوښښونو په پايله کې دروازه نړيدلې او لاره يې خلاصه کړې ده.
