هلمند: طالبانو د ناوې ولسوالۍ د نیولو خبر ورکړ
(کابل ټکی کام ۱۳۹۵ تله ۱۲) زرغون خوږیاڼی
طالبانو په یوه رالیږل شوي خبر کې ویلي، چې ددوی ځواکونو د هلمند ولایت د ناوې ولسوالۍ په بشپړه توګه نیولې ده.
طالب ویاند قاري یوسف احمدي ویلي، چې نن سهار ۵ بجې د ناوې ولسوالۍ په امنیه قومندانۍ سرتیری برید ترسره شو، ورپسې نور طالب وسله وال چې په سپکو او درنو وسلو سمبال وه د امنیه قومندانۍ او ولسوالۍ پر مرکز ورننوتل، چې له څو ساعته جګړې وروسته د ولسوالۍ مرکز، امنیه قومندانۍ او د مکتب پوسته په بشپړه توګه د طالبانو لاسته ولویدې.
طالب ویاند وايي، سرتیری بریدګر( عارف ) له انفجاري موادو ډک هاموي شوبله چې زیات پیمانه قوي منفجره مواد پکې ځای پر ځای شوي وو د یادې ولسوالۍ د امنیې قومندانۍ له مرکز سره انفجار کړه، په برید کې د قومندانۍ ودانۍ په بشپړه توګه ویجاړه او په کې په لسګونو پولیس ځای پر ځای ووژل شول.
ویاند وايي، سهار ۸ بجې ولسوالۍ په بشپړه توګه د طالبانو په لاس سقوط شوه.
د دوی په وینا، تر اوسه یې یو زیات شمیر وسله هم نیولې ده، ((اوس هم په سیمه کې مجاهدین په تصفیوي عملیاتو بوخت دي)).
