(کابل ټکی کام ۱۳۹۵تله ۱۸) الماس خدرخېل
د فراه ولايت يوې امنيتي سرچينې کابل ټکی کام ته ويلي، چې تېره شپه د فراه ولايت اړوند نوبهار سيمه کې چورلکو په دولتي عسکرو د هوا له لارې بمباري وکړه.
سرچينه زياتوي، چې د چورلکو بمباري د کلاله پوستې په دولتي سرتېرو شوې، چې پکې ۲ تنه وژل شوي او ۶ تنه نورعسکر ټپيان دي.
بل پلو د فراه ولايت مرکزي روغتون يو کارکونکي د نوم نه ښودلو په شرط ويلي، چې د نوموړي بمبارۍ ۶ تنه ټپيان يې روغتون ته د تداوۍ لپاره وروړي دي.
ويل کېږي د يادې پوستې اړوند لس تنه سرتيري لادرکه هم دي.
دا په داسې حال کې ده، چې تېره ورځ هم امريکايي چورلکو د کندوز په بالاحصار کې دولتي عسکر بمبار کړل او لسګونو تنو ته يې مرګ ژوبله واړوله.
ګډ حکومت دوه کاله وړاندې له امریکایانو سره دفاعي او امنیتي سند لاسلیک کړ، چې په ترڅ کې یې بهرنيو ځواکونو ته په افغانستان کې له هرډول قضايي تعقیب څخه خوندیتوب ورکړ.
په نوموړي سند کې له ګډ حکومت څخه دا صلاحیت اخیستل شوی، چې هغه دي امریکايي پوځیان په افغانستان کې د هغوی د ترسره کوونکو جنایتونو په تړاو تعقیب یا محاکمه کړي.
همدا لامل دی، چې د یاد حکومت له جوړیدو سره سم په مکرر ډول امریکايي پوځیانو د ولسي وګړو ترڅنګ افغان امنیتي ځواکونه هم بمبار کړي او وژلي، خو د ملي یووالي حکومت یې په مقابل کې له هرډول غبرګون ښکاره کولو څخه ځان بیوسه ګڼي او د ناچارۍ له وجې یې تل ورباندې چوپتیا غوره کړې ده.
