لیکوال : نصیب ځدراڼ
کوم افغان چې د ظاهر شاه په وخت کې دهقانې کوله هغه اوس هم دهقان دی، د کوم لالټین رڼا ته به چې ناست وو نن یې هم هغه لالټین رڼا کړی وي.
یو زوړ بایسکل یې درلود هغه بایسکل نن هم ځغلوي، زړو بوټانو او کلوشو کې به ګرځیدو نن یې هم هغه بوټان او کلوشې په پښو کې دي، بچیان یې مخکې هم ښوونځي ته نه تلل، رمې به یې سهار وختي غرونو او دښتو ته روانې وي، نن یې بل نسل هغه رمه په مخ ده او مکتب ترې پاتې دی، مریضان به یې مخکې هم د مریضۍ له امله ژوند د لاسه ور کولو نن یې هم هغه حال دی.
مونږ خو یې ګټه پرون په ننګرهار کې ولیده، چې چاپه کې یې څلور وروڼه شهیدان کړل، ګټه مو یو څو شپې د رئیس حاجي په کور کې ولیده کله چې د حج مبارکۍ ته راغلي ۱۸ تنه میلمانه د داعش په تور شهیدان شول.
مونږ یې ګته په هلمند کې د اردو په ۳۳ سرتیرو باندې د بمبار په شکل کې ولیده، یوه ګټه یې په فضاء کې په بمونو بار چورلکو او بې پیلوټه الوتکو په شکل کې وینو، چې تل د افغانانو د وینو تویولو پسي ګرځي، پینځلس کاله ورسته چې ګورو دغه رنګ په زرګونو لاس ته راوړنې به و وینو.
یوه ډله بله هم شته هغوی ته بیا تر مونږ مختلفې ګټې رسیدلې دي، په لوړ قیمته او ضد مرمۍ موټرو کې ګرځي او په دنګو او مجللو کورنو کې اوسیږي، د هغوی د کورونو رڼا ته زمونږ ماشومان خوشحاله وي، د هغوی بچیان په خارج کې درسونه وایې، هغه د سر د درد علاج په جرمني او هند کې کوي، هغه د چکر لپاره پاریس او اروپا ته ځي، د هغوی د بچیانو مازدیګری د دوبۍ په کلبونو کې تیریږی.
آخري خبر مې دا چې مونږ ته که د میلیاردونو ډالرو ګټې په دغه شکل کې رارسیږی بیا یې بیخې نه غواړو، چې څوک ورته خوښ دي هغوی دې اروپا ته ورشي او هلته دې یې په بل نوم دا ملیاردونه ډالر واخلي او ګټو ته دې یې کینې، دغو ملیاردونو ډالرو خو زمونږ کلي له ځوانانو تش کړل، هدیرې او زندانو یې آباد کړل.
مونږ هغه مرستو ته اړتیا لرو چې په بدل کې د افغان وینه نه غواړي.
هغه مرستو ته اړتیا لرو چې دیني ارزښتونه یې په بدل کې نه تر پښو لاندې کیږي.
هغه مرستو ته اړتیا لرو چې ملي نوامیس په بدل کې نه رانه غواړي.
هغه مرستو ته اړتیا لرو چې له هیواده مو د جګړې ټغر ټول کړي.
هغه مرستو ته اړتیا لرو چې په هیواد کې مو سوچه اسلامي نظام قایم کړي.
هغه مرستو ته اړتیا لرو چې غله ، مفسدین او پردي جاسوسان نه اتلان کوي.
هغه مرستو ته اړتیا لرو چې اقلیت په اکثریت نه حاکمان کوي.
هغه مرستو ته اړتیا لرو چې د ځمکو غاصبین، شرابخوران او قماربازان وځپي.
هغه مرستو ته اړتیا لرو چې د چورګرو او چپاولګرو لینګي ولړزوي.
هغه مرستو ته اړتیا لرو په مکاتبو او پوهنتونونو کې د فحشاء او بې دینۍ درسونو ته وده ورنکړي.
هغه مرستو ته اړتیا لرو چې هر افغان مو په عزت کې مرفه ژوند وکړي.
هغه مرستو ته اړتیا لرو چې د هیواد اصیل بچیان او ریښتیني اتلان پکې وستایل شي.
اوس نو تاسې فکر وکړئ چې امریکا او ناټو یا په بله اصطلاح یهودیان او نصرانیان زمونږ له غمه مړه دي چې پنځلس نیم ملیارده ډالر به افغانانو ته مفت ورکړي؟؟؟
البته دوی زمونږ ( افغانانو ) نه ټول ملي او اسلامي ارزښتونه اخلي او د مسلمانو افغانانو د وینو تږي او زمونږ د هیواد د دائمي اشغال خوبونه ویني.
مونږ دا ډول مرستې په توپ ولو، د داسې مرستې دې مخ ورک شي، په داسې مرسته لعنت وایو، په داسې مرسته لاړې توکوو.
دا مرستې د امن او سولې لپاره نه دي،د جنګ د دوام لپاره دي،مونږ تر ستړي یو او نور یې نه غواړو!.
