نوې څېړنې ښيي چې په هېواد کې اېډز په چټک ډول خپرېږي

کابل ټکی کام ۱۸ زمری ۱۳۹۴ راپور: حسین د افغانستان د عامې روغتيا وزارت چارواکي وايي، چې د روان زېږديز کال د اېډز د وژونکې ناروغۍ ثبت شوي ناروغان ۶۷۰۰ تنو ته رسېږي. دغه چارواکي د يوه نړيوال راپور په حواله وايي، چې په افغانستان کې د ۲۰۱۳ ز کال د اېډز ناروغان يوازې ۱۷۰۰ تنه وو، چې په تېرو دوه کلو کې ۴ چنده ډېر شوي دي. د روغتيا وزارت د اېډز د کنترول څانګې يوه ډاکټر احسان الله احسان وايي، ډېری د اېډز ناروغان د پېچکاريو له لارې په دې ناروغۍ اخته شوي دي. خو د نړيوال راپورونو پر اساس د اېډز وژونکي ناروغي ۸۰ فيصده د جنسي يوځای والي او يوازې ۱۰ فيصده يې د پېچکاريو د استعمال له لارې له يوه ناروغ څخه بل انسان ته انتقالېږي. د افغانستان د روغتيا وزارت د اېډز د مخنيوي څانګې تېره ورځ په دې اړه په يوه کانفرانس کې وويل، چې د يادې بېمارۍ پټول دغه بېماري نوره هم پياوړې کوي او په تدريجي توګه به دغه مريضان ووژل شي. د عامې روغتيا وزارت مسؤولين وايي، د اېډز ناروغانو ته په سپکه کتل، ناخبري، د جنسي داروګانو استعمال، د پېچکاريو کارول، د مناسبو طبي مراکزو او کافي بوديجې نه شتون هغه لاملونه دي، چې په هېواد کې ياده ناروغي نوره هم خپروي. ياده دې وي چې په هېواد کې د دغې ناوړه ناروغۍ لومړۍ پېښې د روان امريکايي يرغل له پيل وروسته ثبت شوې او افغانستان له دې وړاندې په دې نامه کومه ناروغي نه پېژنده