کابل: د ملي اردو پر رينجرموټر چاودنې مرګ ژوبله اړولې
(کابل ټکی کام ۱۳۹۵لړم ۸) الماس خدرخېل
د راپورونو له مخې تېر ماښام د کابل ښار د پنځمې حوزې اړوند کمپنۍ سيمه کې چاودنه ترسره شوې ده.
چاودنه د ملي اردو په رينجر موټر شوې، چې له امله يې د ملي اردو ۲ سرتيري وژل شوي او يو پوليس او دوه ملکيان ژوبل شوي دي.
د ځايي اوسېدونکو له قوله، چاودنه ډېره درنه وه او تر لرې سيمو پورې يې غږ اورېدل شوی دی.
اوسېدونکي وايي، چې ګڼ شمېر امبولانسونه يې وليدل، چې د پېښې له ځای نه روغتون ته په لاره وه.
يوې امنيتي سرچينې کابل ټکی کام ته وويل، چې په چاودنه کې دوه سرتيري او درې ملکيان ټپیان شوي دي.
د پېښې مسؤوليت تر دې دمه کومې وسلوالې ډلې پر غاړه نه دی اخيستی.
بايد وويل شي، چې د کابل ښار اړوند ځينو سيمو کې د ملي اردو په رينجر موټرو وخت ناوخت د مقناطيسي ماين چاودنې ترسره کېږي، چې چارواکي يې پړه پر وسلوالو طالبانو اچوي.
