(کابل ټکی کام ۱۳۹۵لړم ۱۳) الماس خدرخېل
د داعش يا اسلامي دولت ډلې مشر ابوبکر البغدادي ته منسوب يو غږيز پيغام خپور شوی، چې په هغې کې يې په موصل کې له خپلو جنګياليو غوښتنه کړې، چې بايد مقاومت وکړۍ.
دغه غږيز پيغام چې د داعش پورې تړلې رسنۍ الفرقان تېره ورځ خپور او البغدادي ته منسوب کړی، چې خپلو جنګياليو ته امر کوي، چې شاتګ مه کوئ.
دا په تېر يو کال کې لومړی ځل دی، چې اسلامي دولت ډلې مشر ابوبکر البغدادي خپل غږيز پيغام خپروي.
په داسې حال کې دا پيغام خپرېږي، چې عراقي ګډ ځواکونه د موصل ښار ځينو برخو ته داخل شوي او له داعش وسلوالو سره په سخته جګړه بوخت دي.
ابوبکر البغدادي په دغه غږیز پيغام کې ويلي، چې دی باور لري چې د موصل عمليات به ناکامه کېږي.
هغه په خپلو پلويانو غږ کړی، چې د الله د دښمنانو پر خلاف د روان جهاد کمزوري کولو ته اجازه ورنکړي.
هغه همداراز ويلي، چې: ((دا تورتم شپه په رڼا ورځ بدله کړئ، د دښمنانو کورونه او سیمې ورانې کړئ او د وینو سیندونه يې روان کړئ)).
البغدادي ته منسوب په دغه پيغام کې هغه عراق، امريکا او سعودي عربستان ته هم ګواښونه کړي دي.
څو ورځې مخکې داسې راپورونه هم خپاره شول، چې شايد بغدادي په موصل ښار کې له خپلو جنګياليو سره وي.
بايد وويل شي، چې د داعش ډلې مشر البغدادي په ۲۰۱۵ کال کې يو غږيز پيغام خپور کړی و، چې له هغې وروسته يې د ټپي کېدو او وژل کېدو ډېری ناتائيد شوي راپورونه او ادعا ګانې وشوې.
