لیکوال : م ، نجم الرحمن (فضلي)
ايا په رمضان کې د زکوة ورکول پکار دي
مسئله : له رمضان پرته په نورو مياشتو او ورځو کې د زکوة ورکول صحي دي، په دې کې د رمضان شريف هيڅ تخصيص نشته، بلکې کوم وخت چې په مال باندې کال پوره شي نو په هغه وخت کې د زکوة ورکول بهتر دي.
البته د چا په مال باندې چې کال په رمضان المبارک کې پوره شي نو هغوى دې په رمضان کې زکوة ورکړي، البته دا خبره ضرور شته چې په رمضان المبارک کې د زکوة په ورکولو سره ثواب اويا چنده زيات وي ([1]).
مسئله : د زکوة اداء کولو لپاره کومه ځانګړې مياشت يا کومه ورځ معلومه نه ده، البته د يو شمير مياشتو او ورځو فضيلت په دې کې ضرور ونډه لري، يعنې چې في نفسه برکتي وي، لکه رمضان المبارک چې په دې کې د صدقاتو او وغيره ورکول هم بهتر دي، خو ضرورت د دې دى چې په کومه مياشت کې د زکوة ورکول واجب دي په همغه مياشت کې دې اداء کړي او بيا دې همدغه مياشت مقرره کړي ([2]).
ايا زکوة هر کال شته دى
مسئله : د کومو روپيو او زيوراتو چې يو کال زکوة اداء کړى شي، کله چې دويم کال پوره شي نو بيا د زکوة ورکول لازمي دي، هر کال زکوة واجب الاداء دى، برابره ده که په همدغو روپيو سره کومه ګټه شوې وي او که نه وي شوې ([3]).
د زکوة په ورکولو کې ځنډ کول څرنګه دي
مسئله : کوم وخت چې په مال باندې پوره کال تير شي نو سمدستي دې زکوة ورکړى شي، په نيک کار کې ځنډ کول ښه کار نه دى، شايد چې يو ناڅاپه مرګ راشي او بيا به يې همدغه مواخذه په غاړه پاتې شي، او که چيرته د کال په تيريدلو سره زکوة ورنکړى شي، تر دې چې دويم کال هم تير شي نو داسې کول ګناه دى، دا وخت دې توبه وکاږي او د دواړو کلونو زکوة دې ورکړي، پريږدي دې نه.
لنډه دا چې په خپل ژوند کې د تيرو شويو کومو کلونو چې زکوة نه وي ورکړى شوى هغه دې ضرور اداء کړى شي ([4]).
([1]) مسايل رفعت قاسمي، ج : ٥، ص : ٥٤، بحواله : فتاوى دارالعلوم ديوبند، ج : ٦، ص : ١٠٠.
([2]) مسايل رفعت قاسمي، ج : ٥، ص : ٥٤، بحواله : فتاوى دارالعلوم ديوبند، ج : ٦، ص : ٧٢.
([3]) مسايل رفعت قاسمي، ج : ٥، ص : ٦٣، بحواله : فتاوى دارالعلوم ديوبند، ج : ٦، ص : ٤٧.
([4]) مسايل رفعت قاسمي، ج : ٥، ص : ٦٣ – ٦٤، بحواله : فقه الزکوة، ج : ٢، ص : ٣٦٢.
