(کابل ټکی کام ۱۳۹۵لړم ۲۵) الماس خدرخېل
تېره شپه د ننګرهار ولايت غني خېلو ولسوالۍ کې بهرنيو او افغان ځواکونو د يو شمير ولسي خلکو پر کورونو چاپې وهلي.
ځايي اوسېدونکي وايي، چې افغان ځواکونو د بهرنيانو په ملتيا د يادې ولسوالۍ په نهمه وياله کې د ملکيانو پر کورونو چاپې وهلي، چې پر مهال يې سخته جګړه هم ترسره شوې ده.
طالبانو رسنيو ته ویلي، چې د بهرنيو چاپې سره د دوی پلويانو سخته جګړه کړې، چې له امله يې ۱۳ بهرنيو او افغان ځواکونو ته مرګ ژوبله اړولې ده.
طالبانو په ياده نښته کې د دوی د يو تن ملګري وژل کېدل مني او وايي، چې په جګړه کې يې راغلو عسکرو ته هم زيان اړولی دی.
بايد وويل شي، چې امريکايي ځواکونو شاوخوا يوه مياشت وړاندې د کندوز په بزکندهاري سيمه کې چاپه وکړه، چې پر مهال يې ډيری بهرنيو او افغان ځواکونو ته مرګ ژوبله اوښتې وه.
