کابل ټکی کام ۲۷میزان/۱۳۹۴
قدرت الله حسین
د غور والي سيما جوينده وېره څرګنده کړې ده، چې ښايي سل په سلو کې د ولايتي شورا د غړو او ځايي زور واکانو له لورې ووژل شي.
وروسته له هغه چې د ولايتي شورا يو شمېر غړو په فېروز کوه ښار کې د والي سيما جوينده پر ضد لاريون وکړ، والي رسنيو سره په خبرو کې وويل، چې د ولايتي شورا غړو او خپلسرو قوماندانانو په مرګ ګواښلې ده.
لاريون کوونکو په خپلو خبرو کې ويل، چې والي بې کفايته دی او نه شي کولای د ولايت چارې سمې پر مخ يوسي، ځکه نو بايد لرې شي او پر ځاي یې دولت بل والي ورواستوي.
خو د غور والي بيا وايي، چې دې د دغو کسانو د زورواکۍ او ناقانونو غوښتنو مخه نيولې ده، ځکه يې نو دا او د دې کورنۍ ګواښي او د دې د لرې کولو هڅې کوي.
هغې زياته کړې ده، «دا غیرمسوول وسله وال قوماندانان دي، دوی د بدمعاشانو له ډلې څخه دي، دوی له زرګونو کسانو څخه باج اخېستی او زما د وېرې یوازینی علت همدا دی.
امکان لري چې سل په سلو کې د دې کسانو له خوا ووژل شم، دوی غواړي په هر ډول چې وي، ما، يا زما د کورنۍ غړي له منځه يوسي، ځکه دوی زور او وسلې لري».
هغې د ولايتي شورا پر غړو او نورو غير مسؤولو قوماندانانو تور پورې کړ، چې دوی باج غواړي، پر دې سربېره يې د معارف او د غور د کانال پيسې خوړلي دي، ځمکې يې غصب کړي دي او دا چې زه يې مخه نيسم، زما د لرې کولو غوښتنه کوي.
خو د غور د ولايتي شورا يوه غړي عبد الحميد ناطقي د لاريون پر مهال وويل، چې د ولايتي شورا په استازيتوب موږ له مرکزي حکومته غواړو، چې د غور مسئلې ته جدي پام وکړي.
دواړو لوريو له دولته غوښتنه کړې، چې د مسئلې د څېړلو لپاره دې هلته يو پلاوی ور واستوي، خو دولت تر دې دمه په دې اړه پرېکړه نه ده کړې.
