په ترکیه کې د امریکا په سفارت ډزې شوي
(کابل ټکی کام ۱۳۹۵ لیندۍ ۳۰) زرغون خوږیاڼی
تیره شپه ناوخته د ترکیې په انقره ښار کې یوه وسله وال کس د امریکا په سفارت ډزې کړي دي، چې له امله یې سفارت تړل شوی دی.
د ترکیې دولتي خبري اژانس انادولو په وینا، برید کوونکی د سفارت مخې ته ۸ ډزې کړي، خو چاته پکې زیان نه دی اوښتی.
د سرچینې په وینا، د سفارت ساتونکو دغه وسله وال کس ژوندی نیولی او ځايي پولیسو ته یې سپارلی دی.
په ترکیه کې د امریکایي سفارت په خبر پاڼه کې د برید پخلی شوی دی، ددوی په وینا په ډزو کې چاته مرګ ژوبله نه ده اوښتې، اوسمهال په ترکیه په انقره، ادانا او استنبول ښارونو کې د امریکا ټول سفارتونه تړل شوي او خپل کارونه یې ځنډولي دي.
ویل کیږي چې د امریکا سفارت هم په انقره کې د روسیې په سفیر د برید ځای ته نږدې موقعیت لري.
تر اوسه ددې برید انګیزه نه ده په ډاګه شوې.
په انقره کې د امریکا په سفارت برید په داسې مهال ترسره کیږي، چې تیره ورځ هم د ترکیې یوه پولیس د روسیې سفیر په ډزو ووژلو.
