د ننګرهار د ولايتي شورا پر يوه غړي چاودنه شوې
کابل ټکی کام۳۰میزان/۱۳۹۴
قدرت الله حسین
د ننګرهار د ولايتي شوری غړی افتخار مومند نن سهار له يوې چاودنې روغ وتلی.
د ننګرهار د والي وياند حضرت حسين مشرقيوال رسنيو ته ويلي دي، چې د مومند پر موټر نن سهار د بهسود ولسوالۍ په شاه برهان اغا سيمه کې د کنړ پر لويه لار چاودنه شوې ده.
هغه زياته کړې ده، چې په چاودنه کې د نوموړي يو ساتونکی ټپي شوی دی، خو خپله وکيل ته کوم زيان نه دی اوښتی.
ياد وکيل افتخار مومند رسنيو ته د تلفون له لارې ويلي دي، چې له جلال آباده د ګوشتې پر لور روان و، چې په ياده سيمه کې پرې د سړک د غاړې ماين وچاود.
هغه تاييد کړې ده، چې په چاودنه کې يې موټر ويجاړ شوی او يو ساتونکی يې ټپي دی، خو خپله ده ته کوم زيان نه دی اوښتی.
د پېښې پړه لا چا پر غاړه نه ده اخيستې.
