د ښېرا پر ځای دُعا وکړئ!
اسماعیل فیروز
مشهور عالم معروف الکرخي رحمه الله یوه ورځ په بغداد کې د دجلې سیند په غاړه ناست و، په یوه وړه کښتۍ کې څو ځوانان ناست وو موسیقي یې غږوله او شراب یې څښل، د نوموړي عالم مخې ته تیر شول، د عالم یوه ملګري وویل:
ته په دې اوبو کې دا خلک وینې چې د الله تعالى په سرکشۍ او ګناه بوخت دي ښيرا ورته وکړه، معروف الکرخي رحمه الله لاسونه پورته کړل او ویې ویل:
ای الله”ج”! لکه څرنګه چې دې دوی په دُنیا کې خوشحاله کړي دي، زارۍ درته کوم چې په اخرت کې یې هم همداسې خوشحاله کړه.
ملګري یې ورته وویل:
-موږ درته وویل ښېرا ورته وکړه او ته دعا ورته کوې!
معروف الکرخي رحمة الله علیه ورته وویل:
په اخرت کې چې الله جل جلاله خوشالي ورکوي د دې مطلب دا شو چې، په دُنیا کې به د توبې توفیق ورکړي او که دوۍ توبه وکړي او جنت ته ولاړ شي، تاسې ته هیڅ ضرر نه رسوي.
(طبقات الاولياء لابن الملقن ۱/۴۷.)
ګرانو وروڼو!
تل کوښښ کوئ چې، چاته ښیرا ونکړئ.
د مثال په ډول: که یو بدعمله سړی وي او د ټولنې لپاره شر او فساد وي؛ نو د هدایت دُعا ورته وکړئ چې، یاالله دغه بدعمله ته هدایت وکړه.
که چېرې الله تعالى هغه بدعمله ته هدایت وکړي؛ نو بیا به یې ټولنې ته ډېر خیر ورسیږي.
