د سوريې حکومت مخالفې ډلې: د مذاکراتو وروستی متن له چلونو او مجهولو ټکو ډک دی
(کابل ټکی کام ۱۳۹۵سلواغه ۶) الماس خدرخیل
وړمه ورځ د قزاستان په پلازمينه استانه کې د ترکیې او روسيې په ابتکار د سوريې د حکومت د څوارلسو مخالفو ډلو تر منځ غونډه جوړه شوه.
دغه غونډه چې دوه ورځې يې دوام وکړ، پکې د بشارالاسد د حکومت او د مخالفو وسلوالو ډلو د استازو په ګډون په قزاستان کې د امريکا سفير د ایران استازو او د سوریې لپاره د ملګرو ملتونو ځانګړي استازي سټیفن ډې میستورا هم برخه لرله.
د غونډې په پای کې د ایران، ترکيې او روسيې استازو موافقه وکړه، چې په سوريه کې د اوربند د څارنې لپاره به يو ميکانيزم جوړوي.
د غونډې په وروستي پريکړه ليک کې د سوريې د مخالفو ډلو د جوړجاړي خبره شوې وه، خو د سوریې د رژیم اپوزیسیون د دې پرېکړهلیک له لاسلیکه ډډه کړې ده.
له غونډې وروسته د وسلهوالې ډلې جېشالاسلام د سیاسي برخې مشر محمد علوش وويل”موږ د موافقې دا متن نشو لاسلیکولای، د اپوزیسیون د هغو ډلو په باور چې په استانه کې سره را یوځای شوي وې، دا متن له چلونو او مجهولو ټکو ډک دی.”
د دغې ډلې مشر علوش زياته کړه، چې دوی په پریکړهلیک کې د “جوړجاړي” له ټکي سره مخالفت لري ځکه دوی د جوړ جاړي لپاره نه بلکې د داسې سیاسي حل د موندلو لپاره استانې ته تللي وو، چې په سوریه کې د قدرت سیاسي انتقال ته لار هواره کړي.
د غونډې يو بل ګډونوال او د اپوزيسيون د پلاوي وياند اسامه ابوزيد رسنيو ته وويل: (موږ پهدې موافقه کې برخه نهلرو. دا د روسیې، ایران او ترکیې ترمنځ موافقه ده . هغوی خپلواک هېوادونه دي او هره موافقه چې وغواړي، کولای شي. دا د هغوی خپل بیان دی. کله چې دا بیان د غونډې د وروستۍ اعلامیې په توګه وړاندې کېدو ته چمتو شو، موږ ورته وویل چې یو لړ ملا حظې لرو).
