کابل ټکی کام ۰۴عقرب/۱۳۹۴
قدرت الله حسین
د تخار امنيتي چارواکي وایي، چې په دې ولايت کې د يوې ترافيکي پېښې په ترڅ کې لږ تر لږه ۱۹ تنو مرګ ژوبله اوښتې ده.
د تخار د پوليسو وياند عبد الخليل اسير رسنيو سره په خبرو کې ويلي دي، چې پېښه هغه مهال رامنځته شوه، چې د څو کورنيو وګړي له دشت قلعه ولسوالۍ څخه د خواجه غار پر لور روان وو.
د هغه په وينا په پېښه کې دوه تنه وژل شوي دي او ۱۷ نور ټپيان دي.
اسير د پېښې لامل د چلوونکي بې احتياطي او له اندازې ډېر سرعت ښودلی دی.
ياده دې وي چې د چلوونکو ناړامي او د سړکونو خرابوالی هغه څه دي، چې په افغانستان کې ډېری وختونه د ورته پېښو لامل ګرځي.
