د کاناډا پر مسجد بريدګر د پنځو مسلمانانو د قتل په تور نيول شوی
(کابل ټکی کام ۱۳۹۵سلواغه ۱۲) الماس خدرخیل
د کاناډا پوليو ويلي، چې په دغه هېواد کې د مسلمانانو پر مسجد بريد کونکی يې د پنځو مسلمانانو د قتل په تور نيولی دی.
د پوليسو په وينا نوموړی ۲۷ کلن فرانسوی دی، الکسندربیسونيټ نومېږي چې ۲۷ کاله عمر لري او په کاناډا کې يې زده کړې کولې.
دغه فرانسوي محصل د يکشنبې پر ماښام د کبک په مسجد کې په لمونځ کوونکو ډزې وکړې چې ۶ کسان يې ووژل او ۱۹ نور يې ټپيان کړل.
د کبک پوليسو پر الکسندر د قتل شپږ تورونه پورې کړي او د قتل د هڅې پنځه تورونه نور هم پرې لګول شوي دي.
ويل کېږي دغه بريدګر به د کبک محکمې ته حاضر شي.
سي بي ایس تلوېزین په خپل راپور کې ویلي، چې دغه کس بیسونیټ لافال پوهنتون کې سیاسي علوم لولي. دا پوهنتون له جومات نه نژدې ۳ کیلومتره لیرې دی.
د کاناډا لومړي وزیر جسټن تروډو په یوه خبرپاڼه دغه بريد غندلی او ويلي يې دي: (کاناډايي مسلمانان زموږ د ملي یووالي مهمه برخه جوړوي، زموږ په ټولنه، ښارونو او هېواد کې دغه ډول کارونو ته ځای نه شته).
د مصر ازهر او د اردن پاچا دويم عبدالله هم د کاناډا د کبک په مسجد کې پر مسلمانانو دغه بريد غندلی دی.
