هلمند: طالبانو ۸ تنه ټپي عسکر سره صليب ته سپارلي
(کابل ټکی کام ۱۳۹۵سلواغه ۱۳) الماس خدرخیل
د طالبانو ویاند قاري یوسف احمدي کابل ټکی کام ته په یوه را لیږل شوي خبرپاڼه کې ویلي، چې د دوی جنګیالیو د سنګين په جګړه کې له امنيتي ځواکونو ۲۰ پوستې او ۵ لويې قرارګاوې ونيولې.
طالبانو په دغه خبرپاڼه کې په پوستو کې د نيول شويو وسلو او موټرو معلومات هم خپاره کړي دي.
قاري يوسف ليکي ” په نښتو کې له دښمن څخه، ۲ هاموي ټاکونه، ۱۶ میله پيکا ماشیندار، ۱۹ میله کارمولیان، ۵ قبضې راکټ لانچر، ۳ دهشکې، ۱ وسط هاوان، ۱ میل کماندوز هاوان، ۲ تومانچې، ۵ د پيکا میلان، ۳ پاېي غټې مخابرې، ۵ کوچنې مخابرې، ۵۰ صندوقه ډول ډول مرمۍ په غنیمت نیول شوي دي“.
نوموړی زياتوي، چې په ټوله نښته کې ۲ ټانګونه ويجاړ شوي، له سلو زيات عسکر وژل شوي، چې د ۳۰ جسدونه لا هم په سيمه کې پراته دي، هغه د ۷ عسکرو د ژوندي نيول کېدو او ۸ نورو په ټپي حالت کې د نيولو خبر هم ورکوي.
قاري يوسف ویلي” هغه ۸ تنه ټپي شوي عسکر تیره مازدیګر د انساني همدردۍ له مخې د سره صلیب مؤسسې ته وسپارل شول، ترڅو يې معالجه وشي او بیرته خپلو کورنیو ته واستول شي“.
د هغه په وينا له امينيتي ځواکونو ټولې نيول شوې پوستې او مرکزونه لا هم د دوی سره دي او جګړه روانه ده.
چارواکو په دې اړه له رسنيو سره معلومات نه دي شريک کړي.
په ورته وخت کې په ملي شورا کې د هلمند د خلکو استازي هاشم الکوزي وايي، چې د مارجې، ناوې، نادعلي، موسی قلعه او سنګین ولسوالۍ ټولې محاصره دي او هيڅ دولتي کارمند تګ راتګ نه شي کولی.
