کابل: امنيتي ځواکونو د جنرال دوستم کور محاصره کړی
(کابل ټکی کام ۱۳۹۵کب ۳) الماس خدرخېل
په کابل کې د ګارنيزيون او د پوځ سرتيري له تېرې شپې راهيسې د افغانستان د لومړي مرستيال عبدالرشيد دوستم د کور شاوخوا سيمو کې ځای پر ځای شوي دي.
ويل کېږي، په شېرپور سیمه کې د دوستم کور ته ډېری غځېدلې لارې د خلکو او موټرو پرمخ تړل شوي او په سيمه کې د پوليسو او ملي امنيت ځواکونه تر سترګو کېږي.
يو شمير ټانګونه د دوستم د کور او ځينې نور بيا د لوړ پوړو چارواکو د کورونو شاوخوا سيمو کې ولاړ دي او دوه ټانګونه د لومړي مرستيال د دفتر مخې ته ولاړ دي.
جنرال دوستم له درېيو مياشتو وروسته له خپلو ساتونکو سره چې په پيکا، راکټونو او نورو وسلو سمبال و تېره ورځ خپل دفتر لاړ.
دولتي سرچینو بي بي سي ته ویلي چې پلازمېنې په زړه کې خپل کاري دفتر ته له دومره امنیتي ترتیباتو سره د دوستم د تېرې ورځې ورتګ “ناقانونه” و.
دوستم داسې مهال پرون خپل دفتر ته ستون شو چې د افغانستان لویې څارنوالۍ د ایشچي قضیې په تړاو د هغه د نهو ساتونکو د نیولو امر کړی، خو په دې اړه لا عملي ګام نه دی پورته شوی.
دا چې د لومړي مرستیال کور ولې محاصره دی تر اوسه رسنیو ته په دې اړه معلومات نه دي ورکړل شوي.
