امنيتي مسئولين وايي، د دهمزنګ د بريد تنظيموونکی يې وژلی
(کابل ټکی کام ۱۳۹۵کب۲۱) الماس خدرخیل
د افغانستان د ملي امنيت رياست رسنيو ته په يوه لېږلې خبرپاڼه کې ويلي، چې په دهمزنګ کې پر جنبش روشنايي لاريوونکونکو د بريد تنظيموونکی يې په ننګرهار کې د ګډو عملياتو پر مهال وژلی دی.
د دغه رياست له لوري په خپره شوې خبرپاڼه کې مولوي هاشم په شاهين خراساني مشهور، د ياد بريد د تنظيموونکي په توګه ياد شوی دی.
خبرپاڼه زياتوي، چې خراساني په ننګرهار کې د داعش د ۲۰۰ کسيزې وسلوالې ډلې قومندان و، چې په دغه ولايت کې يې د سرتيرو بريدونو او نورو ترهګريزو کړنو د تنظيم لارې چارې برابرولې.
په خبرپاڼه کې د داعش ډلې د دوه نورو غړيو مولوي عبدالقيوم او مولوي فاروقي د وژلو ادعا هم شوې ده او ويل شوي چې دواړه د اچين ولسوالۍ په (ديوانه بابا بند) سيمه کې وژل شوي دي.
بايد وويل شي، چې څه موده وړاندې د دهمزنګ په عبدالوکیل خان نورستاني څلورلاري کې د جنبش روشنایي پر لاریونوالو سرتيری برید ۸۴ کسه ووژل او له دوه سوه ډېر ټپیان شول.
