افغانستان د پاکستان شازدافير احضار کړی
(کابل ټکی کام ۱۳۹۵کب۲۳) الماس خدرخیل
افغان حکومت په کابل کې د پاکستان د سفارت چارواکي يو ځل بيا احضار کړي دي او په کنړ کې يې د راکټي حملو د مخنيوي په اړه ورته شکايت کړی.
د افغانستان د بهرنيو چارو وزارت په يوه خپره کړې خبرپاڼه کې ويلي، چې تېره ورځ يې په کابل کې د پاکستان د سفارت شازدافير دغې وزارت ته احضار کړی دی.
په خبرپاڼه کې راغلي، چې د پاکستان شازدافير سره د افغانستان د حکومت اندېښنې شريکې شوي او زياتوي چې له تېرې څه مودې راهيسې د پاکستاني ځواکونو له لوري د کنړ پر سرکاڼو او خاص کنړ ولسواليو راکټي حملې روانې دي، چې په اړه يې رسمي شکايت او د بندېدو غوښتنه ترې کړې ده.
خبرپاڼه زياتوي، چې په پاکستان کې د افغان کډوالو سره ناوړه چلند او په زوره له دغه هېواد ايستل هغه مسايل وه، چې نوموړي سره ورباندې بحث شوی دی.
کابل کې د پاکستان د سفارت شازدافير هم په دې اړه خپله خواشينې ښودلې او ډاډ يې ورکړی چې د افغان لوري شکايت به خپلو لوړرتبه چارواکو سره شريک کړي.
په دې اړه په کابل کې د پاکستان سفارت څه نه دي ويلي.
له تېرو څو ورځو راهيسې داسې راپورونه ورکول کېږي چې د افغانستان حکومت د پاکستان د راکټي حملو او د افغانستان پر هوايي حریم د پاکستان د تیري له امله، د ملګرو ملتونو امنیت شورا ته هم رسمي شکایت کړی دی.
