(کابل ټکی کام ۱۳۹۶وری ۱۵) الماس خدرخېل
طالبان وايي چې نړيوالو مرستندويه ادارو په هغو سيمو کې د خلکو سره بشري مرستې نه دي کړي، چې د (اسلامي امارت) تر واک لاندې دي او د دې خلکو سره يې د مور او ميری سلوک کړی دی.
طالبانو په يو رسمي بيان کې ويلي، چې د افغانستان نيمايي نفوس د هغوی تر واک لاندې سيمو کې ژوند کوي، خو بيا هم ورسره برابره مرسته نه ده شوې.
په دغه بيان کې راغلي: (دا يو عيني حقيقت دی چې اسلامي امارت د افغانستان يو انکار نه منونکی نظامي او سياسي قوت دی او د هيواد د دوه دېرش ميلونو څخه له نيمايي زيات نفوس يې تر واک لاندې ژوند کوي؛ خو متأسفانه نړيوالو او نړيوالو سازمانونو، پدې سيمو کې ميشتو عامو افغانانو سره تراوسه کما حقه بشري مرستې نه دي کړي، له دوي سره يې د مور او ميري چلند کړی دی.)
طالبانو پر نړيوالو غږ کړی چې د دوی سره په همغږۍ دې سيمو ته مرستې ورسوي او زياتوي (بايد نړيوال خيريه مؤسسات په تيره بيا اسلامي خيريه مؤسسات د اسلامي امارت د اړوندو کميسونونو سره په هماهنګۍ د اسلامي امارت تر واک لاندې سيمو کې د عامو افغانانو سره مرستې ته را وړاندې شي، د دارالايتامونو، ښوونځيو په جوړولو او درسي کتابونو، بيارغونې ، همداشان د ولس د صحي ستونزو لکه د نري رنځ، شري، ټوخلې، زيړي، پوليو، سؤتغذي، ولادي نسايي امراضو په علاج کې کومک وکړي، اسلامي امارت د دوي امنيت ته ژمن دی.)
طالبانو پر ژورنالستانو هم نيوکه کړې چې ګوندې نړۍ ته يې د افغانستان يو اړخ ښودلی او پر هغوی يې غږ کړی چې بې طرفه و اوسيږي، په دغه بيان کې راغلي (موږ په ژورنالستانو هم غږ کوو چې د اسلامي امارت د فرهنګي کميسون سره په هماهنګۍ د اسلامي امارت تر لاس لاندې سيمو مستند راپورونه جوړ کړي. هلته د اسلامي امارت د حکومتولۍ، د خلکو د ژوند، غوښتنو او اړتياوو په باره کې واقعيتونه څرګند کړي او پدې برخه کې د ولس په وړاندې د خپلې رښتينې ژمنتيا او مسئوليت پور ادا کړي.)
که څه هم طالبانو په تېر کې بار بار پر ژورنالستانو نيوکې کړي، خو دا لومړی ځل دی چې طالبان تر خپل واک لاندې سيمو ته د نړيوالو د مرستو د راجلبولو هڅه او د هغوی د امنيت ژمنه کوي.
تر دې مخکې هم طالبانو د عاجلو بشري مرستو د رسولو لپاره د هیواد په ملي سوداګرو، نړیوالو مؤسساتو، هیوادونو او ملګرو ملتونو غږ کړی چې د اسلامي او بشري خواخوږۍ له مخي د افغانستان د مستحقو سیمو خلکو ته عاجلې مرستې ورسوي.
طالبانو خپلو پلويانو ته ويلي، چې د بشري مرستو رسوونکيو لپاره لازم امنيتي سهولتونه برابر کړي، ترڅو په ډاډه زړه خپلې مرستې اړو خلکو ته ورسېږي.
