د پکتیا ولس : د ډیورنډ پرلیکه د اغزن تار مخه به ونیسو
(کابل ټکی کام ۱۳۹۶ وری ۱۶) محمد طاهر
د پکتیا ولس د ډیورنډ کرښې په اړه د دې ولایت په مرکز ګردیز کې یوه لویه مظاهره تر سره کړه، چې د افغان حکومت نه يې د پاکستان د یرغلګر سیاست مخنیوي غوښتنه وکړه.
په ننني مظاهره کې وویل شو، که حکومت د ډیورند له کرښې دفاع نه شي کولای ولسونه به له خپلې خاورې دفاع وکړي او په حکومت غږ کوو چې د پاکستان له لوري د روانو موانعو مخه دې ژر تر ژره ونيسي.
په دې مظاهره کې مدني فعالانو، قومي مشرانو او دپکتیا عام ولس ګډون کړی و، چې د عبد الطیف پدرام په ورستیو څرګندونې او د ډیورنډ پر لیکه د پاکستان لخوا د اغزن تار لګول په کلکو ټکو وغندل او له ګډ حکومت نه يې د دې کار بندول غوښتي.
د لويې پکتیا فرهنګې ټولنې مشر سید جمال الدین اصف خیل دولت کې په یو شمیر چارواکو د ایران او پاکستان د جاسوسانو تور پورې کړ او له افغان چارواکو ته يې د ډیورنډ پر لیکه د تارونو د منعه کولو خبره وکړه .
دې مظاهره کې يو بل مدني فعال او قومي مخور عبدالهادي حماس د پاکستان پر ضد تُندې څرګندونې وکړې او ويې ويل، دا کرښه د افغانستان د خلکو او ولسونو لپاره د منلو وړ نه ده.
نوموړي زیاته کړه، دا کرښه د افغان ولس په سينه او زړه باندې تېرېږي او هېڅوک به پرې نه ږدي چې دغه اغزن سيم په دې خاوره تېر شي او ټول ولسونه به يې مخه نیسي، خو له حکومته هم غواړو چې د نړيوالو قوانينو په رڼا کې د دې کار مخنیوی وکړي.
د ده په وينا، هېڅوک به پرې نږدي چې د ډېورند فرضي کرښه په دوی د رسمي کرښې په توګه ومني ، تر څو د نړيوالو قوانينو په رڼا کې خپل حدود د پخوا غوندې له ګاونډيو سره معلوم کړي.
