روسيې امریکا ته د دویم ځلي برید په صورت کې د ‘سختو پایلو ‘ خبرداری ورکړ

راپورتاژ: الماس خدرخېل

روسیې د امریکا متحدو ایالتونو هغه توغندويي برید ته توند غبرګون ښوولی، چې د سوریې هوايي ځواک پر یوې اډې یې کړی دی.

ځايي چارواکي او عیني شاهدان وايي، د امريکايي ځواکونو په بريد کې هوايي ډګر په بشپړه توګه ویجاړ شوی دی او سوري پوځ ویلي برید کې شپږ کسان وژل شوي هم دي.

امریکايي چارواکي وايي، دغه اډه د سې شنبې په ورځ شمال لوېدیځه سوریه کې د کیمیاوي وسلو یوه برید لپاره کارول شوې وه.

د ملګرو ملتونو امنیت شورا بېړنۍ غونډه کې د روسیې مرستیال سفیر ولادمیر سفکرونوف امریکا ته پر سوریې د دویم ځلي برید په صورت کې د ‘سختو پایلو ‘ خبرداری ورکړ او زياته يې کړه: (تاسې باید د سختو پایلو لپاره چمتو اوسئ او د دې ټول مسئولیت به د هغو کسانو پر اوږو وي، چې دغه بریدونه یې کړي دي. د هغو پوښتنو په ځواب کې، چې دغه سختې پایلې به څه وي ښاغلي سفکرونوف ویلي: لیبیا ته وګورئ، عراق ته وګورئ.)

د روسیې بهرنیو چارو وزارت ویلي: (دا څرګنده ده، چې پر سوریې د امریکايي برید پلان له مخکې چمتو شوی و. د دغو مسایلو ماهرین پوهېږي، چې پر سوریې د امریکايي برید پلان د ادلب له بریده مخکې چمتو شوی و او د ادلب پېښه د پلمې په توګه کارول کېږي).

بل پلو روسیه واېي د دې حملې په ځواب کې ېي له امریکا سره په سوریه کې دهواېي بریدونو پرمهال د دواړو ملکونو د هواېي قواوو ترمنځ د تماسونو موافقه هم ځنډولې ده.

دغه موافقه د دواړو هېوادونو تر منځ د دې لپاره شوې وه، چې د سوریې فضايي حریم کې د دواړو هېوادونو هوايي ځواکونه پر یوه بل بریدونه و نه کړي.

روسیې دغه راز د سوریې دافع هوا ځواک پیاوړي کولو ژمنه هم کړې ده.

د روسيې ولسمشر ولادیمیر پوتین د جمعې په ورځ وویل: چې دا بريد به د امریکا اوروسیې اړېکو ته زیات نقصان ورسوي او ډیر ناوړه عواقب به ولري.

په ورته وخت کې دغه برید ته ځواب کې د سوریې د ولسمشر بشارالاسد دفتر ” د حمص څنډو کې پر الشعیرات هوايي ډګر د امریکا تېری احمقانه او غیر مسوولانه ” بللی دی.

د ادلب ایالت په خان شیخون سیمه کې، چې راپورونه وايي د داعش تر ولکې لاندې سيمه ده، د کیمیاوي موادو برید کې د ماشومانو په ګډون نژدې ۸۰ کسان وژل شوي وو.

بل لور ته د سره صلیب نړیوالې کمېټې ویلي ‘سوریې کې د امریکا پوځي برید نړیوال وسله وال ټکر بلل کېږي. ‘

”د معلوماتو له مخې امریکا په سوریې کې پر پوځي تنصیب برید کړی او دا د نړیوال وسله وال ټکر په کیټګوري کې راځي. ”

د روسیې صدراعظم دیمیترې میدویدوف ویلي، چې په دې برید سره امریکا د روسیې د پوځ سره د جګړې نه یوازې یو قدم لیرې ده.

د امریکا د پوځ یوه لوړ پوړي قوماندان رسنيو ته ویلي “مونږ ښه خبر یو چې په دې بريد کې چا ورسره مرسته کړې وه.”