شمالي کوريا وايي: چمتو دي چې د امریکا هر ډول تیري ته ځواب ووایي
(کابل ټکی کام ۱۳۹۶وری ۲۳) الماس خدرخېل
شمالي کوریا وايي د اټومي بریدونو او اټومي وسلو د کارولو لپاره یې ټول تياری نيولی دی.
د شمالي کوريا دولتي رسنيو ويلي، که په دغه هېواد د امريکا د هر ډول تيري نښه وويني نو په امريکا به د اتومي وسلو بريد وکړي.
سرچینې زياته کړې، چې شمالي کوريا نه يواځې دا چې د امريکا نظامي اډې په خپله شاوخوا او سويلي کوريا کې په نښه کولی شي، بلکې د دغه هېواد پوځ وړتيا لري چې په خپله امريکا او د دغه هېواد نظامي بيړۍ هم په نښه کړي.
د شمالي کوریا چارواکي وایي ” چمتو دي چې د امریکا هر ډول تیري ته ځواب ووایي”.
دوی يو ځل بيا امريکا ته خبرداری ورکړی چې د شمالي کوريا په شاوخوا کې دې خپل نظامي فعاليتونه ودروي او که داسې ونه کړي، نو پايلې به يې ټولې نړۍ ته خطرناکې وي.
وړمه ورځ د امريکا د سمندري ځواکونو يو قومندان خبر ورکړ، چې د امريکا د تعرضي بريدونو يوه ډله يې د ارام سمندر په لور د احتمالي جګړې لپاره خوځولي دي، چې پکې جنګي بيړۍ او وړي نظامي کښتۍ هم شاملې دي.
