چین په کابل کې تر ټولو معياري کمپلکس جوړوي
(کابل ټکی کام ۱۳۹۶وری ۲۴) الماس خدرخېل
چين په کابل کې د ۴۰ ميليونه ډالرو په ارزښت تر ټولو غوره معياري او فني کمپلکس جوړوي.
تېره ورځ د دغه کمپلکس د بنسټ ډبره د چين سفير په حضور کې د ډاکټر عبدالله له لوري کيښودل شوه.
په کابل کې د چين سفير ياوجينګ وويل، چې د چين هېواد د دغه کمپلکس پر جوړولو ۴۰ ميليونه ډالره پانګونه کوي او دا به په افغانستان کې تر ټولو معياري او غوره کمپلکس وي.
په دې غونډه کي د حکومت اجرایه ریس ډاکټر عبدالله په بېلو برخو کي د چین له مرستو مننه وکړه او زیاته یې کړه، چین تل له افغانستان سره د بنسټیزو پروژو په عملي کولو او پلي کولو کي مرسته کړې او د ورته مرستو د لا ډیرولو غوښتنه یې کړې ده.
عبدالله وویل، پوهه او زده کړې د افغانستان د آبادۍ او پرمختګ لپاره تر ټولو مهمه وسیله ده او هغه هېوادونه چي په دې
برخه کي پانګونه کوي په حقیقت کي د افغانستان د راتلونکو نسلونو لپاره د هوسا ژوند غوښتونکي دي.
تر دې مخکې هم چين په افغانستان کې د ورته پروژو کارونه سرته رسولي او بيا يې افغان دولت ته په واک کې ورکړي دي.
