(کابل ټکی کام ۱۳۹۶غوایی ۲) الماس خدرخېل
په بلخ ولايت کې د شاهين قل اردو تر بريد وروسته ولسمشر اشرف غني د يو پلاوي په مشرۍ بلخ ولايت ته تللی.
د ارګ څخه په خپره شوې خبرپاڼه کې راغلي چې نوموړی نن غرمه له کابل څخه مزار شريف ته ولاړ.
په دغه خبرپاڼه کې د نوموړي د سفر په اړه نور معلومات نه دي ورکړل شوي، خو ويل کېږي چې د بريد د ارزونې په موخه دغه ولايت ته تللی دی.
تېره ورځ ماسپښين مهال شاوخوا دوه بجې وسله والو طالبانو بلخ کې د پوځ پر ۲۰۹ شاهین قول اردو ډله ییز برید وکړ، چې پکې سلګونه پوليس افسران او عسکر ووژل شول.
ځينو رسنيو ويلي چې دغه بريد کې تر ۱۳۰ زيات عسکر وژل شوي او لږ تر لږه ۶۰ نور ټپيان دي.
د ملي دفاع وزارت وياند دولت وزيري وايي، دې بريد کې له سلو زياتو سرتيرو ته مرګ ژوبله رسيدلې خو لا هم کره ارقام نه دي تر لاسه شوي.
د وزيري په وينا، د پېښې په اړه څېړنې رواني دي او ممکن چې د تلفاتو په شمير کې تغيرات راشي.
د طالبانو وياند ښاغلی مجاهد وايي، په بريد کې د لوړ پوړو چارواکو په ګډون تر پنځه سوو زياتو دولتي سرتيرو ته مرګ ژوبله اوښتې ده.
مجاهد وايي، په دغه بريد کې هغه څلورو نفوذي طالبانو هم برخه درلوده چې څو کاله يې په شاهين قول اردو کې دنده تر سره کړې وه.
