(کابل ټکی کام ۱۳۹۶غوایی ۵) الماس خدرخېل
شمالي کوريا د دوه نويو اتومي توغنديو ازمونې ته تياری نيولی او يوځل بيا يې امريکا ته ګواښونه کړي دي.
دا څرګندونې په شمالي کوريا کې د روسيې سفير الکساندر ماتسيګوري کړي او زياته کړې يې ده، چې په قوي احتمال سره شمالي کوريا دوه نور اتومي توغندي د ازموينې لپاره تيار کړي او ښايي په نږدې ورځو کې دغه ازموينه ترسره کړي.
د روسیې سفیر ویلي، چې شمالي کوریا د اپریل په ۲۵ م د پوځ د تاسیس ۸۵ یمه کلیزه لمانځي او د دې ډېر احتمال شته چې دا توغندي په دې ورځ وازمايي.
د شمالي کوریا رسنيو د دغه هیواد د دفاع وزیر پاک یانګ سیک له خولې ليکلي: (د امریکا او یا متحدينو لخوا يي هر ډول برید ته تر ټولو سخت ځواب ورکولو ته پوره تیاری لرو او د يرغل په صورت کې به امريکا د نړۍ له نقشې لرې کړو).
بل پلو په ملګروملتونو کې د امریکا دایمې استازې نيکې هیلي ویلي، چې د شمالي کوریا لخوا په پسیفیک سیمه کې ددوې په عسکري اډو د برید او یا د اوږد واټنه اتومي توغندیو د ازمایښت په صورت کې به امریکا چپه خوله پاتې نشي او نوموړي هیواد ته به لازم ځواب ورکړي.
شمالي کوريا په دې وروستيو کې د توغنديو يو نوی ماشين وازمايلو او ويلي و چې نړۍ به په نږدې راتلونکې کې د دې ماشين په اهميت او ارزښت پوه شي.
