”ننګرهار کې دوه امریکایي عسکر ښایي خپلو ملګرو وژلي وي“

کابل ټکی کام| ۱۳۹۶، غوایی ۹- د پنټاګون ویاند وایي چې د تیرې چهارشنبې په شپه له داعش وسله والو سره په جګړه کې دوه امریکایي عسکر ښایي د خپلو ملګرو په ډزو وژل شوي وي.

د تېرې چهار شنبې په شپه د ننګرهار ولایت په اچین ولسوالۍ کې دوه تنه امریکایي عسکر  له داعش وسله والو سره د جګړې پر مهال ووژل شول او یو بل ټپي شو. دغه دوه تنه امریکایي عسکر جاشوا روجرس (Jushua Rodgers) او کامرون توماس (Cameron Thomas) نومېږي.

 د پنټاګون ویاند جیف ډاویس پرون ورځ رسنیو ته وویل چې ”د امریکا پوځ څیړنه کوي چې آیا دغه عسکر تصادفا د جګړې په وخت کې د خپلو امریکایي ملګرو په ډزو کې وژل شوي او که د افغان عسکرو په ډزو.“ ډاویس وایي ”موږ د هغه دوه تنو عسکرو د مرګ په اړه څیړنه کوو چې د تیرې چهارشنبې په ورځ له داعش وسله والو سره د درې ساعته جګړې په ترڅ کې وژل شوي. ښایي دغه عسکر د خپلو افغان، یا امریکایي ملګرو په ډزو کې وژل شوي وي.“

د ډاویس په خبره ”په یاده جګړه کې ۵۰ امریکایي او ۴۰ افغان عسکرو برخه اخیستې وه چې پکې ۳۵ داعش وسله وال ووژل شول.“ ډاویس زیاتوي چې د یادو عملیاتو هدف د داعشیانو مشر عبدالحسیب و، خو خبر نه دي چې نوموړی وژل شوی دی او که نه؟

ځینې کارپوهان له دعش سره جګړې ته د شک په سترګه ګوري او وایي کوم امریکایي عسکر چې له وسله والو طالبانو سره د جګړې پر مهال ووژل شي، امریکایي چارواکي یې رسنیو ته له داعش وسله والو سره په جګړه کې وژل شوي، ښیي.