(کابل ټکی کام ۱۳۹۶ غوایی ۱۴) محمد طاهر
د پاکستان د څارګرې ادارې (ISI) مشر نوید مختار د کابل تر سفر وروسته ویلي، د افغان حکومت له مشرانو سره دې توافق ته رسېدلی چې د ډیورنډ کرښې شاوخوا به ګډ عملیات ترسره کړي.
نوید مختار د ډيلي پاکستان ورځپاڼې ته ویلي، له افغان چارواکو سره یې هوکړه کړې، چې د ډیورنډ کرښې په شاوخوا کې به د وسله والو د ځپلو په موخه ګډ عملیات تر سره کوي او د کرښي پرسر به امنیتي تدابیر سخت کړي.
د ګډ حکومت مشرانو تر اوسه د نوید مختار د سفر په هکله چې په کومو مسایلو يې خبرې کړي څه نه دي ویلي.
دا لومړی ځل نه دی، چې افغان چارواکي د پاکستان پوځ ته په خپله خاوره کې د عملیاتو اجازه ورکوي بلکې له دې وړاندې هم پاکستاني پوځونو د ننګرهار پر لعلپوري ولسوالۍ کې د تحریک طالبانو لټون پسې عملیات تر سره کړي.
د یادونې وړ ده، چې د پاکستان لخوا د ډيورنډ پر کرښه د اغزن تار لګول او پر پوله پوستي زیاتول د ګډ حکومت په سلا مشوره تر سره شوي، خو افغان ولس ترې ناخبره دی، چې دا ځل هم د کرښي پر سر د تدابیرو د سختولو تر نامه لاندې هوکړي به د پاکستان پوځ ته اجازه ورکړي، چې پر ډیورنډ کرښه به نور هغه اقدامات تر سره کړي د کومو چې حق نه لري.
