(کابل ټکی کام ۱۳۹۶غوایی ۱۴) الماس خدرخېل
د بدخشان ولايت په مرکز فيض اباد کې د شپږمې حوزې د ماموريت مرستيال قوماندان په ګډون څلور پوليس وژل شوي او دوه نور ټپيان دي.
يوې ځايي امنيتي سرچينې کابل ټکی کام ته وويل، تېره شپه وسله والو طالبانو د فيض اباد شپږمې حوزې اړوند ده بالا سيمه کې د امنيتي ځواکونو پر پوسته بريدونه ترسره کړل، چې دواړو غاړو ته نښته رامنځته شوه.
د سرچينې په وينا د طالبانو په بريد کې دواړو غاړو ته مرګ ژوبله اوښتې خو په اړه يې کره معلومات نه لري.
بل پلو د وسله والو طالبانو وياند ذبيح الله مجاهد رسنيو ته په لېږلې خبرپاڼه د ياد بريد مسئوليت په غاړه اخيستی دی.
طالبان وايي، په دغه بريد کې يې د شپږمې حوزې د ماموريت مرستيال قوماندان (عاشور) له ۳ نورو پوليسو سره وژلی او څلور پوليس يې ټپيان کړي هم دي.
طالبانو خپل لوري ته د يو تن وژل کيدل او د يو بل ټپي کيدل منلي دي.
په خبرپاڼه کې راغلي، طالبانو په ياده جګړه کې له امنيتي ځواکونو ډیری پوځي توکي هم نيولي دي.
تر دې دمه د بدخشان ولايتي چارواکو په دې اړه رسنيو ته څه نه دي ويلي.
شاوخوا دوه اوونۍ مخکې وسله والو طالبانو د دغه ولايت د زيباک ولسوالۍ هم له دولتي ځواکونو څخه ونيوله.
