(کابل ټکی کام ۱۳۹۶غوایی ۱۴) الماس خدرخېل
د تخار امنيتي چارواکي وايي، چې په دغه ولايت کې يې د لسګونه طالبانو په ګډون د تخار ولايت لپاره د طالبانو له لوري ټاکل شوی مرستيال والي هم وژلی دی.
د تخار امنيه قوماندان پاسوال فيرمحمد جوزجاني رسنيو ته ويلي، د امنیتي ځواکونو پر مهال يې د خواجه بهاوالدين ولسوالۍ هم د طالبانو له شتونه پاکه کړې ده.
نوموړی دعوه کوي، چې په دغه عملياتو کې يې د طالبانو د مرستيال والي مولوي قادر په ګډون ۶۷ طالبان وژلي او لسګونه نور ټپيان کړي دي.
خو طالبان بيا د چارواکو څرګندونې ردوي او وايي، چې په دغه ولايت کې نه کوم طالب چارواکی او نه هم نور طالبان وژل شوي.
د طالبانو وياند ذبيح الله مجاهد کابل ټکی کام ته د چارواکو دغه ادعاګانې رد کړې او زياته يې کړه دا د (دښمن پروپاګند دی).
بايد وويل شي، چې له تېرو څو ورځو راهيسې د يادې ولسوالۍ په خواجه بهاوالدين او درقد ولسواليو کې د طالبانو او امنیتي ځواکونو تر منځ سختې نښتې روانې دي.
