(کابل ټکی کام ۱۳۹۶ غوایی ۱۴) محمد طاهر
د فراه ولایت امنیتي چارواکي وايي، چې د دې ولایت په «پرچمن» ولسوالۍ کې د پولیسو او طالبانو تر منځ نښته کې شپږ وسله وال وژل شوي او څلور پولیسو هم خپل ژوند له لاسه ورکړی دی.
د یادې ولسوالۍ امنیه قومندان ولي احمد مبارز رسنیو سره په خبرو کې وویل، تیره شپه د دې ولسوالۍ د سرمشکان په یوه امنیتي پوسته طالبانو برید وکړ، چې په پایله کې ۴ پولیس ووژل شول او ۳ نور ټپیان شوی دی، هغه زیاته کړه چې طالب برید کونکو ته يې هم مرګ ژوبله اړولي ده.
خو د طالبانو ویاند ذبیح الله مجاهد وايي، چې د منصوري عملیاتو په ګړندي بهیر کې د فراه ولایت په پرچمن ولسوالۍ کې طالب جنګیالیو له پولیسو یو پوسته په بشپړه توګه نیولي او ګڼو پولیسو ته يې مرګ ژوبله اړولې ده.
د مجاهد په خبره، پوسته کې له دښمن نه کلاشینکوفونه، مخابرې، ۳ موټر سایکلونه او ځینې نور مهمات پاتې وه چې د دوی پلویانو ته په لاس ورغلي دي.
