کابل ټکی کام| پنجشنبه، ۱۴ غویی، ۱۳۹۶- په افغانستان کې د لومړي ځل لپاره یو خصوصي مخابراتي شرکت د ۴جي (4G) انټرنیټي خدمتونه وړاندې کوي.
د افغان بیسیم خصوصي مخابراتي شرکت وایي چې یاد شرکت په پلازمېنه، کابل کې ۴جي انټرنیټي خدمتونه شروع کړي او وروسته به د افغانستان نورو ښارونو ته هم وغځیږي.
د افغان بیسیم شرکت مشر، امین رامین د ۴جي خدمتونو د شروع کېدو په مراسمو کې وویل چې یاد شرکت د لومړي ځل لپاره په هېواد کې ۴جي انټرنیټي خدمتونه وړاندې کوي. نوموړي وایي چې د (۴جي) انټرنیټي خدمتونو چټکوالی به، په یوه ثانیه کې ۷۲ میګابایټو ته رسېږي.
رامین وایي چې اوس مهال د کابل ښار په ۵۰ ځایونو کې ۴جي خدمتونو پیل شوي او وروسته به ټول هېواد ته وغځیږي.
په افغانستان کې ۴جي انټرنیټ په داسې مهال کې شروع کیږي چې ډيری کاروونکي لا د ۳جي انټرنيټ له چټکوالي او لوړې بیې نه شکایت کوي، خو د افغان بیسیم شرکت وایي چې نوی ۴جي انټرنیټ به د پخوا په نسبت چټک او ارزانه وي.
اوس مهال په افغانستان کې ۴ میلیونه وګړي انټرنيټ کاروي.
