د اروپایي اتحادیې د پولیسو اداره له ټیلیګرام نه سر ټکوي او وایي چې له دوی سره مرسته نه کوي.
ټیلیګرام چې یو پیغام لیږونکی اپلیکیشن دی او د یو روسي وګړي له لورې جوړ شوی دی، د جهادي ډلو غړي یې د نورو اپلیکېشنو په نسبت زیات کاروي او له همدې لارې خپل خبرونه له خلکو سره شریکوي. خو اوس د اروپایې اتحادیې د پولیسو لخوا غندل شوی او وایي چې د جهادي ډلو د غړو په پیدا کولو کې مرسته نه ورسره کوي.
د اروپایي اتحادیې د پولیسو د ادارې (یوروپل) مشر، راب وین رایټ وایي چې ټیلیګرام د ”د ترورستانو“ په اړه معلومات دوی ته نه ورکوي. نوموړی وایي ”ځینې له موږ سره همکاري نه کوي یو هم پکې ټیلیګرام دی، چې تر ټولو زیات موږ ته مشکل جوړوي.“
رايټ زیاتوي چې ټیلیګرام له موږ سره د فیسبوک او ټویټر په نسبت ډيره لږ همکاري کوي، ”چې له فیسبوک او ټویټر سره یې مقایسه کول هیڅ دي.“
د نړۍ لویې کمپنۍ او ټولنیزي شبکې لکه ګوګل، فیسبوک، ټویټر او نور، د سختو فشارونو له امله له نړیوالو پولیسو، سي آی اې او نورو استخباراتي شبکو سره د خپلو کاروونکو معلومات شریکوي.
د تېر ۲۰۱۶م کال فبرورۍ میاشت کې ټیلیګرام ویلي و، چې ټيلیګرام هره میاشت ۱۰۰ میلیونه کاروونکي لري، هره ورځ ۳۵۰۰۰۰ نوي کاروونکي پیدا کوي او په یوه ورځ کې ۱۵ بیلیونه پیغامونه ورباندې لیږل کیږي.
بریال عاطف
