ليكنه : مسکا ریحان
یوه ښایسته ښځه پر لاره روانه وه. یوه سړي ولیده او ترشا پسي روان سو. ښځه چې هري خواته ځي سړی هم مسلسل ورپسي ځي. آخر ښځه ورته ودرېده او په قهر سره یې ور څخه وپوښتل چې خیریت دی، چې ماتعقیبوې؟ سړي ورته و ویل چې زه درباندې عاشق یم.
ښځي ورته و ویل که پرما عاشق سوی یې نوزه به ښه لاره در وښیم.
سړي په خوشالي سره ورته و ویل، چې: و وایه څه وکړم؟
هغې ورته و ویل زما (خور) ترما ډېره ښایسته، اوجذابه ده ترما وروسته را روانه ده، ورسه پرهغې عاشق سه اوهغه به هيڅ ممانعت هم ونه کړي.
سړی هم د دې څخه ولاړ اوپه هغې بلي ښځي پسې سو.
کله چې یې هغه ولیده نو ډېره بدرنګه اوقهرجنه وه او بد بد یې ورته وکتل. سړی بیرته ژرلمړنۍ ښځي ته ورچابک سو اوهغې ته یې داسي و ویل: ولي دې درواغ و ویل؟
ښځي هم ورته و ویل چي تاخوهم درواغ و ویل.
سړي ورته و ویل، چي څنګه؟
ښځي ورته و ویل که په ریښتیا هم پر ما عاشق وای، نوبلي ښځي ته ولي ور تللې؟
سړی شرمنده اوسرځوړی سو اوپر خپله لار ولاړ.
هو! نننۍ دنیا په دغسي تظاهري عاشقانو ډکه ده چې څوک ځان د وطن عاشق بولي، څوک د ملت او څوک هم ځان د دین عاشق بولي خو په عمل او واقعیت کي دا هرڅه بازاري او تظاهري وي بلکې خپل سیاسي تجارت یې روان کړی وي او همدا علت دی، چې هرڅه وران او عصیان دي هیڅ نه سمېږي.
حل لاره ئې داده چې بایللې تقواء ولټوو. هغه څه تعقیب کړو چې لپاره ئې راغلي یو. د(ریا) د دړو څخه (باطن) پاک اوصفاکړو. خپل وجدان، خپل زړه، اوخپل دماغ داسي متمرکز کړو چې ښه ته ښه او بد ته بد و وایو یعني: هغه امر تعمیل کړو چې الله ج راته راکړی اودهغه نهي څخه پرشاسو چې الله ج منعه کړي یو.
