کابل ټکی کام| ۱۵ غویی، ۱۳۹۶- د کندهار ولایت په سپین بولدک ولسوالۍ کې د افغان او پاکستاني ځواکونو تر منځ جګړه له اته ساعته دوام وروسته درېدلي ده.
جګړه نن سهار شاوخوا ۳:۴۵ بجې شروع شوې وه او اته ساعته یې دوام کړ. د وروستیو معلوماتو له مخې په جګړه کې دواړه خواو ته ۱۳ تنه وژل شوي او ۷۷ نور ټپیان شوي دي.
دې غاړې ته ۴ پولیس وژل شوي او ۱۴ تنه نور ټپیان دي. همدا راز ۲۳ افغان وګړي ټپیان شوي.
ځینو پاکستاني رسنیو ویلي چې په هغه غاړه کې ۸ تنه ملکي وګړي وژل شوي او له څلویښتو نه زیات کسان ټپیان شوي دي. د ځايي خبریالانو په خبره، په ټپیانو کې امنیتي منسوبین هم شامل دي.
ټاکل شوې چې نن مازیګر څلور بجې به افغان او پاکستاني سرحدي چارواکي په یوه ګډه غونډه کې په دې هکله خبرې وکړي.
جګړه په ۲ کلیو، لقمان کلي او نظر کلي کې پیښه شوې وه. پاکستاني ځواکونو غوښتل د لقمان او نظر په کلیو کې هم سر شمېرنه ترسره کړي خو افغان سرحدي ځواکونو اجازه نه ده ورکړې او جګړه پیل شوه.
له جګړې وروسته افغان سرحدي ځواکونو دواړه کلي بېرته پاکستاني ملېشه ځواکونو ته ورپریښي دي.
