سوريې د بنديانو پټولو لپاره د مړو سوځولو بټۍ جوړه کړې
(کابل ټکی کام ۱۳۹۶غوایی ۲۶) الماس خدرخېل
امريکايي چارواکي وايي، د سوريې دولت د وژل شويو بنديانو د پټولو لپاره د مړو سوځولو بټۍ جوړه کړې ده.
د امريکا د بهرنيو چارو وزارت هغه انځورونه خپاره کړي، چې د (صيدنايا) زندان څخه يې د سپوږمکۍ په مټ اخيستي دي.
ملګري ملتونه او د بشري حقونو ډلې وايي، زرګونه بندیان په دغه زندان کې د سوريې د لوړ پوړيو چارواکو له لوري په دار ځړول شوي.
د بي بي سي د راپور له مخې د منځني ختيځ چارو کې د امريکا د بهرنيو چارو مرستيال وزير ستيورات جونز وانګټن کې دغه اسناد وړاندې کړي.
هغه وويل، د ګڼو سرچینو د ویناوو پربنسټ، د سوریې رژیم په نوموړي زندان کې هره ورځ تر ۵۰ پورې زندانیان وژلي او مړي یې په ډله ییزو قبرونو کې خښ کړل شوي دي.
د هغه په وينا په دغه زندان کې داسې آلې لګول شوي چې د وژل شويو بنديانو اثار او شواهد له منځه يوسي.
جونز ويلي، د ۲۰۱۱ او ۲۰۱۵ مو کلونو تر منځ د بشارالاسد په مشرۍ سوريې چارواکو له ۶۵ زره تر ۱۱۷ زره کسان بنديان کړي دي.
جونز د اسنادو د وړاندې کولو پر مهال وويل، چې د ۲۰۱۳م کال راهيسې په دغه زندان کې د وژل شوي بنديانو د سوزولو بټۍ جوړه شوې ده.
د بخښنې نړيوال سازمان د مالوماتو له مخې د دوه زره يوولسم کال له پيل راهيسې هلته شاوخوا ۱۳ زره بنديان په د سوريې د لوړپوړيو چارواکو په امر په دار ځړول شوي دي.
