کابل ټکی کام (غويي ۱۳۹۶/۲۶ چار شنبه)
له کابل ښار نه نن زموږ یوه همکار (کابل ټکی) کام ته وویل چې تېره ورځ شاوخوا ۱۱ بجې د کابل په ښار کې ناګهانه یو د پاخه عمر څښتن په داسې حال کې راڅرګند شو ؛ چې پټکی يې وهلی ؤ ، افغاني کالي یې په تن وو او په ښۍ اوږه باندې يې سپينه ټوټه را ځړېدلې وه چې پرې ليکلي وو (لآاله الا الله محمد رسول الله) او تر دغې مبارکې کليمې لاندې ليکلي وو ((امارت اسلامي افغانستان)) ګواکې داسې ښکارېده ؛ چې دغه سپينه ټوټه د افغانستان د اسلامي امارت بیرغ ؤ او د دغه سړي په ښي لاس کې توره هم وه چې له تيکي وتلې یې له ځان سره وړله او تېزه څوکه يې د مخې خوا ته وه ، بیا يې دغه شعار ښه په جوش او جذبې سره زمزمه کولو (( الله اکبر ، مرګ په کفارو او د دوی په مزدورانو ، زنده باد د افغانستان اسلامي امارت ، موږ په دې ملک کې کفار او کفري نظام نه غواړو ، موږ اسلامي نظام غواړو ))
نو په دغه حال کې پوليس راغلل ، د دغه سړي لاسونه یې پرې وتړل او له ځان سره يې پوستې ته یووړ.
