ارزګان: د ملي اردو څلورمې لوا د رئيس ارکان په ګډون لس پوليس وژل شوي
(کابل ټکی کام ۱۳۹۶غوایی ۳۰) الماس خدرخېل
د ارزګان ولايت چارواکي وايي، چې د مرکز ترينکوټ اړوند د شاه منصور مکتب او سپينې خاورې په سيمه کې د وسله والو طالبانو او امنيتي ځواکونو تر منځ نښتې شوي، چې دواړو غاړو ته يې مرګ ژوبله اړولې ده.
د دغه ولايت د امنيې قوماندانۍ يو لوړرتبه چارواکي دوهم څارن ملک زين الله رسنيو ته ويلي، لومړی طالبانو په ياده سيمه کې د امنيتي ځواکونو پر پوستو بريدونه وکړل چې په شپږو ساعتونو کې يې ټولې پوستې ونيولې، خو د لږ وخت په تېريدلو سره بيرته د امنيتي ځواکونو لاس ته ولويدې.
نوموړی وايي، په دغه جګړه کې د ملي اردو دوه سرتيري، دوه پوليس وژل شوي او درې نور ټپيان دي.
هغه وويل په دغه جګړه کې له لسو زياتو طالبانو ته مرګ ژوبله اوښتې ده، خو طالبانو د خپلو دوه تنه پلويانو ټپي کيدل او يو بل وژل کیدل منلي دي.
بل پلو يوې امنيتي سرچينې پژواک ته ويلي،چې په دې جګړه کې د ملي اردو د څلورمې پلې لوا د ارکان رييس ډګروال نجيب الله په ګډون څلور د ملي اردو کسان وژل شوي او څلور نور ټپيان دې .
طالبانو د دغه بريد مسئوليت په غاړه اخيستی او رسنيو ته يې په يوه لېږلې خبرپاڼه کې ويلي، چې په دې جګړه کې يې د رئيس ارکان په شمول دولس عسکر وژلي او د هغوی څلور نقليه وسايط يې سوزولي دي.
طالبان وايي، په ياده جګړه کې يې له دولتي عسکرو وسلې او يو شمير پوځي توکي هم له ځان سره وړي دي.
