د پکتیا په مرکز گردیز کې ډلییز برید شوی
ګردیز نه تازه راپورونه وايي چې یو شمېر برید کوونکي د پکتیا په مرکز ګردیز کې د نوي کابل بانک ودانۍ ته پورته شوي دي او له امنیتي ځواکونو سره په جګړه بوخت دي .
د پکتیا د والي ویاند عبدالله حسرت پيښه تاییدوي وایي برید د ګڼه ګوڼې په یوه سیمه کې شوې خو تر اوسه د تلفاتو او د برید کوونکو دقیقه شمیره نه ده معلومه.
نوموړي دغه راز وویل چې امنیتي ځواکونه سیمې ته ور روان دي او هڅه کوي چې د برید کوونکو سره وجنګیږي او برید پای ته ورسوي.
برید نن د شنبې په ورځ له غرمې وروسته دوه نیمې بجې پیل شوی چې اوس هم روان دی .
د یادونې وړه ده چې تر دې دمه د برید مسؤلیت چا په غاړه ندی منلی.
