روسیې سفارت: د افغان چارواکو پر بې بنسټه تورونو اندېښمن یو
(کابل ټکی کام ۳ غبرګولي۱۳۹۶) محمدحارث
د روسیې سفارت یو ځل بیا خبر ورکړی چې دوی له ترهګرو سره هیڅ نوعه مرستې نه دي کړي. او د افغان چارواکو بې بنسټه تورونه چې ګواکې روسیه له وسله والو طالبانو سره مرستې کوي په کلکو ټکو رد کړي دي.
کابل کې د روسیې د سفارت له لوري په خپره شوې اعلامیه کې راغلي: چي هېواد یې له هېڅ وسله والې ډلې سره مرسته نه ده کړې او نه له دوی څخه ملاتړ کوي.
په یاده اعلامیه کي د روسیې د سفیر الکساندر مانتیتسکي له خولې راغلي، چې د روسیې سفارت د ځينو افغان چارواکو د وروستیو بې بنسټونه تورونو له امله سخت اندېښمن دی.
نوموړي زیاته کړې، ځینې افغان چارواکي تور پورې کوي چي د ناپېژانده الوتکو پر مټ وسله والو ته اکمالات کيږي. خو دا خبره چې یادې ناپېژاندې الوتکې به د روسیې وي هیڅ حقیقت نه لري.
په کابل کي د روسیې سفارت په ځانګړي ډول د کندهار د امنیې قومندان جنرال رازق، د اروزګان د امنیې قومندان جنرال سنګري او د ۲۱۵ قول اردو د مشر جنرال احمدزي هغه تورونه رد کړي چي وايي د طالبانو په لیکو کي روسیي مشاوران فعالیت کوي.څو ورځې مخکې د بلخ والي عطا محمد نور په یوه خبري غونډه کې طالبان په څو برخو ووېشل او زیاته یې کړه چي هر هېواد د وسله والو طالبانو یوه ډله تمویلوي.
د روسیې سفارت دا ډول تورونه رد کړي او ویلي دي، باید د ناپېژندل سویو الوتکو په اړه له هغو خلکو پوښتنې وشي چي د افغانستان د هوايي حریم کنټرول یې په لاس کې دی.د سیاسي چارو کار پوهان په دې نظر دي چې افغان چارواکي دغه بې بنسټه تورونه یواځې د دې لپاره کوي چې په دا وروستیو ناکامیو پرده واچوي او ولس له حقایقو بې خبره وساتي.
