کندهار: میوند کې د ملي اردو سرتېرو ته مرګ ژوبله اوښتي
(کابل ټکی کام ۴ غبرګولی ۱۳۹۶) محمدحارث
د خبري منابعو له قوله تېره شپه ناوخته د کندهار په میوند ولسوالۍ کې د وسله والو او افغان دولتي ځواکونو ترمنځ نښته شوې، په نښته کې د ملي اردو درې سرتېري وژل شوي او اته تنه نور بیا ټپیان دي.
د کندهار د والي ویاند صمیم خپلواک د خبر په تائید برسېره وایي، د ملي اردو سرتېرو ته هغه مهال مرګ ژوبله واوښته چې کله وسله والو پر یوه پوسته برید وکړ.
د نوموړي په خبره وسله والو ته هم مرګ ژوبله اوښتې خو دقیق شمېر یې نه دی معلوم.
دا په روانه هفته کې په کندهار ولایت کې د ملي اردو پر سرتېرو دوهم برید دی چې دغو ځواکونو ته مرګ ژوبله اړوي.
خو لا تر اوسه د دې پېښې مسؤلیت چا بر غاړه نه دی اخیستی.
طالب وسله والو سږني منصوري عملیاتو کې په لویه کچه پراخوالی راوستی چې دولتي ځواکونه یې له وار خطابي سره مخ کړي.
