روسيه وايي، سوريه کې يې د داعش موټريز کاروان بمبار کړی
(کابل ټکی کام ۱۳۹۶غبرګولی ۶) الماس خدرخېل
د روسيې هوايي ځواکونو د سوريې په پالميرا ښار کې د داعش ډلې موټريز کاروان بمبار کړی، چې له امله يې ۱۲۰ داعش وسله وال وژل شوي دي.
د سپوټنک خبري اژانس د روسيې د دفاع وزارت له قوله ويلي، چې د داعش ډلې دغه موټريز کاروان چې د پنجشنبې په ورځ د رقه ولايت څخه د سوريې پالميرا ته روان و چې د لارې په اوږدو کې د روسيې د الوتکو د بمبارۍ لاندې راغله.
دفاع وزارت ويلي، په بمبارۍ کې پيک آپ موټر چې په سپکو او درنو وسلو سمبال وه د ۱۲۰ داعش وسله والو په ګډون له منځه وړل شوي دي.
د دفاع وزارت وايي، دغه ښار ته ټولې لارې يې تر سخت څار لاندې نيولي او هغه وسله وال چې ښار ته د ننوتلو او يا وتلو هڅه وکړي، د دوی د بې پيلوټه او جيټ الوتکو د بمبارۍ هدف به وګرځي.
د ۲۰۱۵م په ۵ مياشت د داعش وسله والو او د اسد رژيم د ځواکونو تر منځ خونړۍ نښتې وشوې، چې په پايله کې يې دغه ۲۰۰۰ کلن لرغونی د پالميرا ښار د داعش تر واک لاندې راغلو.
