د افغانستان او پاکستان لوبډلو تر منځ کرکټ لوبې کېږي
(کابل ټکی کام ۱۳۹۶غبرګولی ۷) الماس خدرخېل
د افغانستان او پاکستان د کرکټ بورډ مسئولينو موافقه کړې، چې په راتلونکو مياشتو کې به د دواړو لوبډلو تر منځ د کرکټ شل اوريزې سيالۍ ترسره کړي.
دغه موافقه تېره ورځ په لاهور کې د افغان او پاکستاني کرکټ مسئولينو تر منځ په کتنه کې وشوه.
د افغانستان د کرکټ بورډ مشر عاطف مشعل او د پاکستان کرکټ بورډ مشر شهريار خان په دې موافقه کړې، چې لومړی لوبه به په کابل کې او دوهمه لوبه به په لاهور کې د افغان او پاکستاني کرکټ ټيمونو تر منځ ترسره شي.
ټاکل شوې ده چې د دواړو هېوادونو ترمنځ لومړنۍ شل اوریزه سیالي په راتلونکې جولايې میاشت کې په افغانستان او دوهمه په اګسټ کې په پاکستان کې وشي.
د افغانستان د کرکټ بورډ مشر عاطف مشعل وايي کرکټ او نور سپورتونه بايد د سياست نه لرې وي او په وينا يې: زه دلته د خپلو ژمنو تازه کولو لپاره راغلی یم او ورزش باید د حکومتونو تر سیاسي اغیز لاندې را نه شي.
د دواړو لوريو تر منځ هوکړه شوې، چې په دغه لوبو کې به يو سريز او د الف او سيمه ييز ټيمونو تر منځ به هم يو لړ مسابقې کېږي.
د دواړو ټيمونو مشران باور لري، چې په دغسې سياليو کې به د دواړو هېوادونو په اړيکو کې پراختيا زياته شي.
