د جلال اباد او هرات ښاروالانو دندې ځنډول شوې دي
(کابل ټکی کام ۱۳۹۶غبرګولی ۷) الماس خدرخېل
د افغانستان د سيمه ييزو ارګانونو اداره وايي، د جلال اباد او هرات ښاروالانو دندې يې ځنډولي دي.
دغې ادارې ويلي، پر دوی زيات شوي شکايتونه د دې لامل شول چې د دوی دندې وځنډول شوې.
د دغې ادارې وياندې منيره يوسفزاده رسنيو ته ويلي، د دغو دواړو ښارونو له شاروالانو خلکو شکايتونه درلودل چې شکايتونه يې تر ولسمشر او د دوی تر ادارې پورې هم رسېدلي و.
يوسفزاده زياتوي، پر دوی د لږېدلو تورونو او شکايتونو د څېړنې لپاره پلاوی ټاکل شوی او د هرات او جلال اباد ښاروالان يې کابل ته ورغوښتي دي.
هغه وايي، د پلاوي تر ارزونې وروسته به په دې اړه نور جزيات هم په ډاګه کړي.
