مسکو کې سخت توپان ۱۱ کسان وژلي دي
(کابل ټکی کام ۱۳۹۶غبرګولی ۹) الماس خدرخېل
د روسيې رسنيو ويلي، چې د دغه هېواد په پلازمينه مسکو کې سخت توپان ۱۱ کسان وژلي او شاوخوا ۷۰ تنه نور يې ټپيان کړي دي.
راپورونه وايي، دغه توپان ودانيو، سټيشنونو ته د زيانونو اړولو سربيره ځاني تلفات هم اړولي دي.
د مسکو ښاروال سرګي بيانین ويلي، په توپان کې ۱۱ کسان وژل شوي او لږ تر لږه اويا کسان نور ټپيان دي.
د دغه هېواد د انرژۍ وزارت ويلي، د سخت توپان له امله برېښنا پرې شوې، د ټرانسپورټ نظم خراب شوی او اوس مهال په مسکو کې زرګونه کورنۍ برېښنا نه لري.
مسئولين وايي، چې دوی هڅه کوي ترڅو د برېښنا او د موټرو نظم ژر ترژره فعال کړي.
